چکوال ، 22 فروری
(اوشین نیوز) ڈپٹی کمشنر قراۃ العین ملک نے کہا ہے کہ ضلع چکوال و تلہ گنگ کے لئے ضلعی انتظامیہ کے مرتب کردہ بیوٹیفکیشن پلان میں سر سبز و شاداب ماحول کے فروغ پر خصوصی توجہ مرکوز کی گئی ہے جس کی بدولت داخلی و خارجی مقامات پر تزئین و آرائش کے دیگر امور کے ساتھ ساتھ خوشنما شجر کاری کو بھی یکساں اہمیت دی گئی ہے۔
انہوں نے یہ بات کلمہ چوک تلہ گنگ کی تزئین و آرائش کی تکمیل پر افتتاح کے بعد پودا لگا کر شجر کاری کا آغاز کرتے ہوئے کہی ۔
اس موقع پر ضلعی انتظامیہ ، محکمہ جنگلات اور دیگر متعلقہ شعبوں کے افسران و اہلکاران نے بھی شرکت کی ۔
ڈپٹی کمشنر قراۃ العین ملک نے ضلع چکوال و تلہ گنگ کے بیوٹیفکیشن پلان پر گفتگو کرتے ہوئے کہا کہ شہری علاقوں کے داخلی راستوں سمیت اہم مقامات کو تزئین و آرائش کے ذریعے پرکشش بنانے کے عمل میں دلکش شجر کاری بھی سر سبز و شاداب سکیم کی ترجیحات کا اہم جزو ہے اور اس پر عملدرآمد کے لئے میونسپل اداروں اور محکمہ جنگلات سمیت دیگر سرکاری محکموں کو بھرپور کردار ادا کرنا ہوگا۔
